Sa patuloy niyang pagpapakita ng kawalan ng respeto sa batas at mga institusyon sa Pilipinas, ngayon naman ay nagtatago na si Janet Lim Napoles, ang sinasabing pinuno ng pork barrel fund scam dito sa Pilipinas.
Marami ang hindi nabigla, kabilang na si Justice Secretary De Lima, na maaga niyang nalaman ang paghahain ng arrest warrant sa kanya. Malawak ang kanyang koneksyon sa pamahalaan at military sa Pilipinas.
Kung sino man ang mga tumutulong kay Napoles, sana ay makonsyensya na kayo at gawin ninyo ang nararapat. Marami mang salapi ang taong ito ngunit hindi niya ito nakamit sa malinis na paraan.
Ginagamit niya ang kanyang pera at ari-arian upang bilhin ang mga prinsipyo ng mga tao. Nagagawa ng kanyang mga kasama sa negosyo na itikom ang kanilang bibig at magbulag-bulagan sa mga krimen ni Napoles dahil sa malaking halaga na inaasahan nila dito. Pati mga pari diumano ay pinagagamit niya ng isa sa mga bahay niya. Marahil ay hindi alam ng mga ito ang mga tunay na gawain ni Janet Napoles.
Sana ay huwag nang pagtakpan o protektahan si Napoles. Kung pinagbabantaan man ni Napoles ang mga opisyal na sangkot sa scam na ito at sila ay nangagamba sa maaaring mangyari, hindi ninyo maitatama ang inyong katiwalian sa patuloy ninyong pagpoprotekta kay Napoles.
Walang komento:
Mag-post ng isang Komento